Çi me ez?

Di hembêza sed dek û dolabê de efsaneyeke bêdeng
ji işweya bayê hênik, toza dek û dolabê xwarî
li pişt her derdê kenekî, dijwariyeke razayî
di dilê şevên daristanekê, razeke veşarî.
 
Çi me ez?
Feryadên berz bi zincîrê girêdayî
nêrîneke sosret a dînîtiyekê, a tev li bîranînan bûyî
jehra dawerivî, ji bin diranê sed umîdî
dijûna nizm a ji devê qehbikeke nebaş a rojgarê ketî.
 
Çi me ez?
Bermayeyê karwanê sivikbar ê daxwazê
xwelî û ariya li riyekê
çivîka derbider a ku riya hêlînê windakirî
di şeveke tarî.
 
Ez çi me?
Lekeyeke şermizariyê li pêşa jiyanê
ji şermizariya jiyaneke aloz a tûmanekî
nalîneke şkestî di gewriya bêkesekî
raza negotî û sirûda nexwendî.
 
Ez çi me?
.......................................
.................................
............................
.....................
 
Ez çi me?
Devbikenê pir melûl ê payîzeke rofirînê
di lêgerîna şevê ...
Pûsiyeke ku ketiye ber lepê şeva jiyanê
bê nav û bê nîşan
dilxwazê dîtina tava mirinê.

Gulan 1960

Ji farsî: Umîd Demîrhan